
马尔巴大师教言集MARPA33འཁོར་ལོ་བཞི་ལ་བརྟེན་པའི་ཙཎྜ་ལཱི་ལ་བསླབ་པ་ཟབ་མོ།
2-1-111b
༄༅། །འཁོར་ལོ་བཞི་ལ་བརྟེན་པའི་ཙཎྜ་ལཱི་ལ་བསླབ་པ་ཟབ་མོ།
༄༅། །འཁོར་ལོ་བཞི་ལ་བརྟེན་པའི་ཙཎྜ་ལཱི་ལ་བསླབ་པ་ཟབ་མོ་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །དེ་ལྟར་གཏུམ་མོ་འཁོར་ལོ་གཅིག་ལ་བརྟེན་པ་དང་གཉིས་ལ་བརྟེན་པ་ལ་བསླབ་པའི་ཚུལ་རྫོགས་ནས། ད་ནི་འཁོར་ལོ་བཞི་ལ་བརྟེན་པ་ལ་བསླབ་པའི་ཚུལ་ཏེ། དེ་ཡང་སྤྱིར་གཏུམ་མོ་ལ་འཁོར་ལོ་ལ་མི་བརྟེན་པ་དང་། བརྟེན་པ་ཉིད་ལ་ཡང་གདམས་ངག་གིས་སྔ་མ་ལྟར་གཅིག་དང་གཉིས་ལ་བརྟེན་པ་ཡང་ཡོད་མོད་ཀྱི། རྒྱུད་ཀྱི་གཞུང་ནས་གསལ་བར་གསུངས་པ་ནི་འཁོར་ལོ་བཞི་ལ་བརྟེན་པ་འདི་ཡིན་པས། འདི་ལ་གདམས་པ་ཕྱིན་ཅི་མ་ལོག་པ་ཅིག་གིས་ཟིན་པ་ནི་ཤིན་
2-1-112a
ཏུ་གལ་ཆེ་བ་ཡིན་ནོ་ཞེས་གསུང་ངོ་། །དེ་ལ་འཁོར་ལོ་བཞི་ལ་བརྟེན་པ་འདི་ལ་ཡང་དངོས་པོའི་གནས་ལུགས་ལམ་གྱི་རིམ་པ་འབྲས་བུ་སྐྱེ་བའི་རིམ་པ་གསུམ་ལས། དང་པོ་ནི་ཕ་མ་གཉིས་ཀྱི་བྱང་ཆུབ་ཀྱི་སེམས་བར་དོའི་རྣམ་ཤེས་གསུམ་འདྲེས་པ་ལས་མངལ་སྐྱེས་ཀྱི་མི་ལུས་འགྲུབ་པ་ན། དང་པོ་ཁོ་ནར་ལྟེ་བ་སྤྲུལ་པའི་འཁོར་ལོར་ཨ་ཤད་ཀྱི་རྣམ་པ་ལྟ་བུ་འགྲུབ་ལ། དེ་ཉིད་ལ་གཞུང་གཞན་ནས་ཀླུ་དབང་འཁྱིལ་པའི་རྩ་ཞེས་ཀྱང་ཟེར་རོ། །དེ་ལས་ཨ་བ་དྷཱུ་ཏི་གྲུབ་པ་ནི་ལུས་ཀྱི་དབུས་དྲང་པོར་གནས་པར་བཞེད་ལ། དེ་ཡང་ཡར་སྣ་ནི་ཚངས་པའི་བུ་གར་ཐུག་ལ། མར་སྣ་ནི་གསང་གནས་ཀྱི་འོག་སོར་བཞི་ན་གནས་པའོ། །དེ་ལས་གཡས་པ་དང་གཡོན་པའི་རྩ་གཉིས་བྱུང་སྟེ། དེ་ཡང་ཡར་སྣ་ནི་སྨིན་ཕྲག་གཉིས་སུ་ཟུག་ལ། དེ་ནས་མར་སོང་སྟེ་སྤྱི་བོར་ཅུང་ཟད་འདུས་ཏེ་སྤྱི་བོའི་རྩ་གསུམ་འདུས་པའི་ཆོས་འབྱུང་གྲུབ་ནས། དེ་ནས་ཅུང་ཟད་བཀྱེད་ནས་མར་ལ་སོང་ནས་མགྲིན་པར་འདུས་པས་དེའི་ཆོས་འབྱུང་གྲུབ་ནས། ཡང་སྔ་མ་ལྟར་མར་སོང་ནས་སྙིང་གར་འདུས་ནས་དེའི་ཆོས་འབྱུང་གྲུབ། ཡང་སྔ་མ་ལྟར་མར་སོང་ནས་ལྟེ་བར་འདུས་པས་དེའི་ཆོས་འབྱུང་གྲུབ་ནས། ཡང་སྔ་མ་ལྟར་མར་སོང་སྟེ་གསང་གནས་ཀྱི་འོག་སོར་བཞི་
2-1-112b
ཙམ་ན་རྩ་གཉིས་པོ་དེའི་མར་སྣ་གྱེན་དུ་ལོག་སྟེ་ཨ་བ་དྷཱུ་ཏིའི་ནང་དུ་ཆུད་པས་ཡི་གེ་ཆའི་དབྱིབས་ལྟར་གྱུར་པ་དེ་ལྟ་བུའི་རྩ་གསུམ་པོ་དེ་ནི་འཁོར་ལོ་ལྔའི་སྲོག་ཤིང་གི་ཚུལ་དུ་གནས་པའོ། །དེ་གསུམ་ལས་གྱེས་པའི་ཚུལ་གྱིས་དང་པོ་ལྟེ་བ་སྤྲུལ་པའི་འཁོར་ལོ་ནང་ན་རྩ་འདབ་ར། ཕྱི་རོལ་ན་སྔགས་ཀྱི་བདག་ཉིད་ཅན་གྲུབ་པའོ། །དེའི་དབུས་ཀྱི་ལྟེ་བ་ལ་ཨ་མ་བསྒོམས་པའི་ཆགས་པ་མ་སྐྱེས་ཙ་ན་ཁ་དོག་སེར་བོར་གནས་ལ། བསྒོམས་པའི་ཆགས་པ་སྐྱེས་ཙ་ན་ཁ་དོག་དམར་པོར་འགྱུར་བ་མེ་རླུང་གི་རང་བཞིན་ཅན་ཅིག་གནས་ཏེ། དེ་ཉིད་རླུང་གི་རང་བཞིན་ཅན་ཡིན་པས་རྩོལ་བས་རླུང་སེམས་གཉིས་དེར་བསྡུས་པས་སྤོར་བ་ཡིན་ལ། མེའི་རང་བཞིན་ཅན་ཡིན་པས་གཏུམ་མོ་ཡེ་ཤེས་ཀྱི་མེ་འབར་བར་འགྱུར་བའོ། །དེའི་ནང་འདབ་མ་བརྒྱད་ཀྱི་མདུན་ནམ་ཤར་གྱི་འདབ་མའི་ནང་དུ་ཨ། དེ་ནས་གཡས་སྐོར་དུ་ཤར་ལྷོ་_འི་_འཚམས་(མཚམས་)སུ་ཀ ལྷོར་ཙ། ལྷོ་ནུབ་ཏུ་ཊ། ནུབ་ཏུ་ཏ། ནུབ་བྱང་དུ་པ། བྱང་དུ་ཡ། བྱང་ཤར་དུ་ཤའོ། །འཁོར་ལོ་འདི་ནི་ཤེས་རབ་ཀྱི་བདག་ཉིད་དེ་འཁོར་ལོ་དང་ཡིག་འབྲུ་ཀུན་ཀྱང་ཁ་གྱེན་དུ་ལྟ་བའོ། །དེ་ནས་སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་བདག་ཉིད་དེ། དེའི་དབུས་སུ་ཡི་གེ་ཧཱུཾ། མདུན་ནམ་ཤར་དུ་བྷཱུཾ། ལྷོར་ཛྲི། ནུབ་ཏུ་ཨཾ། བྱང་དུ་ཁཾ་ངོ་། །
2-1-113a
འཁོར་ལོ་དེ་ནི་ཐབས་ཀྱི་བདག་ཉིད་དེ་འཁོར་ལོ་དང་ཡིག་འབྲུ་ཀུན་ཡང་ཁ་འོག་ཏུ་ལྟའོ། །འཁོར་ལོ་དེ་གཉིས་ནི་ཐབས་དང་ཤེས་རབ་ཁ་སྦྱོར་རོ། །དེ་ནས་མགྲིན་པ་ལོངས་སྤྱོད་ཀྱི་འཁོར་ལོ་ནང་ན་རྩ་འདབ་བཞི་ཕྱི་རོལ་ན་བཅུ་གཉིས་ཀྱི་བདག་ཉིད་ཅན་ཏེ། དེའི་དབུས་སུ་ཡི་གེ་ཨ། མདུན་ནམ་ཤར་དུ་མཾ། ལྷོར་ལམ། ནུབ་ཏུ་པཾ། བྱང་དུ་ཏཾ་ངོ་། །འཁོར་ལོ་དེ་ཡང་ཤེས་རབ་ཀྱི་བདག་ཉིད་དེ་འཁོར་ལོ་དང་ཡིག་འབྲུ་ཀུན་ཀྱང་ཁ་གྱེན་དུ་ལྟ་བའོ། །དེ་ནས་སྤྱི་བོ་བདེ་བ་ཆེན་པོའི་འཁོར་ལོ་འདབ་མ་སོ་གཉིས་ཀྱི་བདག་ཉིད་ཅན་ཏེ། དེའི་དབུས་སུ་ཡི་གེ་ཧཾ་ཁ་དོག་དཀར་པོ་སྟེ། དེ་ཡང་རྩ་ཧའི་དབྱིབས་སུ་གནས་ལ། དེ་ན་གནས་པའི་བྱང་ཆུབ་སེམས་ཀྱི་ཐིག་ལེ་དཀར་བས་ཟླ་ཚེས། དམར་བས་ཐིག་ལེ་བྱས་པའི་ཚུལ་གྱིས་གནས་པའོ། །འདི་ཉིད་ཁམས་ས་ཆུའི་རང་བཞིན་ཡིན་ནོ། །དེ་ཡང་སའི་ཁམས་ཀྱི་བདག་ཉིད་ཡིན་པས་གཏུམ་མོའི་མེས་བཞུ་དགོས་པ་ཡིན་ལ། ཆུའི་ཁམས་ཀྱི་བདག་ཉིད་ཡིན་པས་དེ་ལས་བྱང་ཆུབ་སེམས་ཀྱི་ཐིག་ལེ་འཛག་པར་འགྱུར་བའོ། །འདིའི་འདབ་མ་རྣམས་ལ་ཡི་གེ་དགོད་པ་ནི་འདིའི་ལུགས་ཀྱིས་མི་བཞེད་པ་ཡིན་ནོ། །འཁོར་ལོ་འདི་ནི་ཐབས་ཀྱི་བདག་ཉིད་དེ། འཁོར་ལོ་དང་ཡི་གེ་ཁ་འོག་ཏུ་ལྟ་བ་སྟེ་དེ་གཉིས་ཀྱང་ཐབས་ཤེས་རབ་
2-1-113b
ཁ་སྦྱོར་རོ། །དེ་ནས་གཡས་པའི་རྩ་ཐབས་ཀྱི་བདག་ཉིད་ཁ་གྱེན་དུ་ལྟ་བ་དེ་ལ་ཤེས་རབ་ཀྱི་བདག་ཉིད་མགོ་ཐུར་ལ་བསྟན་པ་དགོད་སྟེ། ཐབས་ཤེས་རབ་ཁ་སྦྱོར་དུ་བྱ་བ་དང་ཉི་མའི་རླུང་དགག་པའི་དགོས་པ་ཡོད་པའོ། །དེ་ནས་གཡོན་པའི་རྩ་ཤེས་རབ་ཀྱི་བདག་ཉིད་ཁ་ཐུར་ལ་བལྟས་པ་དེ་ལ་ཀཱ་ལི་ཐབས་ཀྱི་བདག་ཉིད་མགོ་གྱེན་ལ་བསྟན་པ་དགོད་སྟེ། དེ་ཡང་ཤེས་རབ་དང་ཐབས་ཁ་སྦྱོར་དུ་བྱ་བ་དང་ཟླ་བའི་རླུང་དགག་པའི་དགོས་པ་ཡོད་པའོ། །དེ་ལྟར་འཁོར་ལོ་ལྔ་དང་གཡས་གཡོན་གྱི་རྩ་ན་གནས་པའི་ཡི་གེ་དེ་དག་ཀྱང་རྩའི་ནང་ན་བྱང་ཆུབ་ཀྱི་སེམས་ཡི་གེའི་རྣམ་པར་གནས་པ་སྟེ། དེ་དག་ནི་རྣལ་འབྱོར་པའི་ལུས་ལ་ངོ་བོ་ཉིད་ཀྱིས་གནས་པས་དངོས་པོའི་གནས་ལུགས་ཞེས་བྱའོ།། །།དེ་ནས་ལམ་གྱི་རིམ་པ་གནད་རྣམ་པ་གསུམ་དང་ལྡན་པར་སྒོམ་པ་ལས། དུས་ཀྱི་གནད་ནི་སྔར་དང་འདྲ་ལ། ལུས་ཆོས་པའི་གནད་ནི་ལྕགས་སོ་གཉིས་རེའུ་མིག་ལྟར་བསྣོལ་བ་ལ་སྤུ་ནེ་གུའི་མཚམས་སུ་སྦྱར་ལ། དེ་ལ་སུས་(ལུས་)འཁྱུད་ཞིག་གིས་བལྟམས་(བསྡམས་)ཏེ། དེའི་ཁྱད་པར་གྱི་དགོས་པ་ནི་ཨ་བ་དྷཱུ་ཏིའི་མར་སྣ་གསང་གནས་ན་ཡོད་པ་དེ་ཁ་བྱེ་ནས་འོང་སྟེ། དཔེར་ན་ཉའི་དཔྲལ་བར་མཛུབ་མོ་བཞག་པས་ཁ་གདང་གིས་འོང་བ་ལྟ་བུའོ། །དེ་ནས་ལག་པ་མཉམ་
2-1-114a
བཞག་གི་ཕྱག་རྒྱ་ལྟེ་བའི་འོག་ཏུ་བཙིར་ཏེ་དེས་ནི་དྲོད་མྱུར་དུ་སྐྱེ་བའོ། །སྒལ་པ་རིན་པོ་ཆེ་བརྩེགས་པ་ལྟར་དྲང་པོར་བསྲང་སྟེ། དེས་ནི་རླུང་འཁྱིམས་པའི་ནད་མི་འཇུག་པའོ། །མགྲིན་པ་ལྕགས་ཀྱུ་ལྟར་ཡིད་ཙམ་དགུ་བར་བྱས་ཏེ། དེས་ནི་རླུང་ལྟེ་བའི་འོག་ཏུ་གནོན་པས་ཁྱད་པར་དུ་རླུང་གནོན་པའོ། །སོ་དང་མིག་ལ་གནད་མེད་པས་ཅི་བདེར་བཞག་གོ །འོག་སྒོ་རང་སོར་གཞག་སྟེ་སྒོམ་སྐྱོན་ཆུང་བའི་དགོས་པ་ཡོད་པའོ། །བསྒོམ་པ་ཡུལ་གྱི་གནད་ནི་ལྟེ་བའི་ཨ་ལ་སེམས་གཏོད་པ་སྟེ། འདི་ལ་གསུམ་སྟེ། རླུང་གི་རྣལ་འབྱོར་དང་། མེའི་རྣལ་འབྱོར་དང་། བྱང་ཆུབ་སེམས་ཀྱི་རྣལ་འབྱོར་གྱི་ཚུལ་གྱིས་སེམས་གཏོད་པའོ། །དེ་ལ་དང་པོ་ནི་སྔོན་དུ་ལུས་སྦྱང་པ་བྱ་སྟེ་འགོ་ཅུང་ཟད་བསྙེང་ཞིང་གཡས་དང་གཡོན་དུ་གཅུ་བ་དང་། ལག་པ་ཡང་མདུན་དང་རྒྱབ་ཏུ་བསྐོར་ཞིང་བརྐྱང་བར་བྱའོ། །དེ་ལྟ་མ་ཡིན་ན་རླུང་གནས་སུ་ཡང་མི་ཚུད་ལ། ཚུད་པའི་རླུང་གིས་ཀྱང་ཕན་མི་ཐོགས་ཏེ། དཔེར་ན་ཞོ་རྐྱལ་མ་སྤངས་པའི་ནང་དུ་ཞོ་བླུགས་པར་ཡང་མི་ནུས་ལ། བླུགས་པས་ཞོས་ཀྱང་ཕན་མི་ཐོགས་པ་བཞིན་ནོ། །དེ་ནས་རླུང་སྦྱང་བ་བྱ་སྟེ། དེ་ཡང་ནང་ནས་ཕྱིར་བུས་ལ་རྟའི་དབུགས་ལྟར་སངས་ཀྱིས་ཕྱིར་གཏང་བར་བྱའོ། །དེ་ལྟ་བུ་ལན་འགའ་ཞིག་བྱ་སྟེ། དེས་ནི་
2-1-114b
རླུང་འཛིན་པའི་དུས་སུ་ཟིན་སླ་བ་དང་། ཟིན་ཡང་འགོ་(མགོ་)མི་ན་བའི་དགོས་པ་ཡོད་པའོ། །དེ་ནས་རླུང་གི་རྣལ་འབྱོར་དངོས་ནི། རྗེ་བཙུན་ནཱ་རོ་པའི་ཞལ་ནས། རྔུབ་དང་དགང་དང་ཞི་བ་དང་། །མདའ་ལྟར་འཕང་དང་རྣམ་པ་བཞི། །སྦྱོར་བ་བཞི་ལྡན་མ་ཤེས་ནས། །ཡོན་ཏན་སྐྱོན་དུ་འགྱུར་བའི་ཉེན། །ཞེས་གསུངས་པས། དང་པོ་རྔུབ་པའི་སྦྱོར་བ་ནི་དབུགས་ནར་གྱིས་ཕྱིར་སོང་པའི་རྗེས་ལ་དང་པོ་སྣ་བུག་དེ་ནས་ཡི་གེ་ཨོཾ་གྱི་རང་བཞིན་དུ་སྨིན་འཚམས་(མཚམས་)ཀྱི་བར་དུ་བརྔུབས་ལ། དེ་ནས་དགང་བའི་སྦྱོར་བ་ནི་རྩ་གཉིས་ཀྱི་སྣ་སྨིན་ཕྲག་ན་ཡོད་པ་ནས་ཞུགས་ཏེ་ཨོཾ་གྱི་རང་བཞིན་དུ་རྩའི་ལམ་ཇི་ལྟ་བ་བཞིན་དུ་སོང་ནས་གསང་གནས་ཀྱི་འོག་སོར་བཞི་ནས་ཡར་ལོག་སྟེ་རྩ་གཉིས་ཀྱི་མར་སྣ་ཨ་བ་དྷཱུ་ཏིའི་ནང་དུ་ཚུད་པ་ནས་གྱེན་དུ་བྱུང་སྟེ་ལྟེ་བའི་ཨ་ལ་རེག་པར་བྱས་ལ། སེམས་ཀྱང་དེ་ཉིད་ལ་གཏད་དེ། བཀང་བའི་སྡུག་བསྔལ་དེ་ཅུང་ཟད་ཞི་བར་བྱས་པ་ནི་ཞི་བའི་སྦྱོར་བའོ། །དེ་ཉིད་ཐུབ་ཚད་དུ་གཟུང་ཞིང་མ་ཐུབ་ན་ཡང་ཆེད་དུ་དྲག་དང་དྲག་ཏུ་བརྔུབས་ཏེ་སྔ་མ་ལྟར་དགང་བའི་རིམ་གྱིས་རླུང་དང་རྣམ་ཤེས་ཨ་ལ་བསྡུས་ལ་ཞི་བའི་སྦྱོར་བ་བྱའོ། །དེ་ལྟར་ཡང་ནས་ཡང་དུ་བྱས་པའི་རྩོལ་བ་དྲག་པོས་བསྒོམས་ལ། ངེས་པར་རླུང་མི་ཐུབ་པར་འཆོར་བ་ན་རང་བཞིན་རྩ་གཉིས་སམ་སྣ་བུག་གཉིས་
2-1-115a
ནས་འགྲོ་ཡང་ཡིད་ཀྱིས་རླུང་ཧཱུཾ་གི་རང་བཞིན་དུ་ཨ་བ་དྷཱུ་ཏིའི་ལམ་ནས་ཚངས་པའི་བུ་ག་ནས་མདའ་ལྟར་རྒྱངས་ཀྱིས་སོང་བར་བསམ་མོ། །དེ་ནི་མདའ་ལྟར་འཕང་བའི་སྦྱོར་བའོ། །དེ་ལྟར་རླུང་ཡི་གེ་གསུམ་གྱི་རང་བཞིན་དུ་བྱེད་པ་ནི་རྡོ་རྗེ་བཟླས་པ་ཞེས་བྱ་སྟེ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བཟླས་པའང་ཡིན་པས་ཐབས་ཁྱད་པར་ཅན་ཡིན་ནོ་ཞེས་གསུང་བ་ནི་ཤིན་ཏུ་ལེགས་པར་སེམས་སོ། །དེ་ལྟ་བུའི་ཚུལ་གྱིས་རླུང་ཐུབ་ཚད་དུ་འཛིན་པ་དེ་ཐུན་གཅིག་ལ་ཡང་རྩོལ་བ་རབ་ཀྱིས་ལན་ལེ་འབྲིང་གིས་དྲུག་ཐ་མས་ཀྱང་གསུམ་ཙམ་དུ་བསྒོམ་པར་བྱའོ། །དེ་ནས་ཐུན་གཏོང་བ་ན་ལྟེ་བའི་ཨ་དེ་ནང་ལྷན་ཅིག་སྐྱེས་པའི་རྡོ་རྗེ་བདག་མེད་མ་ཞེས་བྱ་བ་མཁའ་འགྲོ་མ་ཐམས་ཅད་ཀྱི་གཙོ་མོ་ཡིན་པར་གོ་བར་བྱས་ལ། དེ་ལ་དམིགས་ཏེ་སྲིད་དང་མྱ་ངན་ལས་འདས་ཤིང་། །སྲིད་དང་མྱ་ངན་འདས་ལ་གནས་ལྟེ་བའི་དབུས་ན་བཞུགས་ཤིང་འཕྲ། །ཆོས་དང་ལོངས་སྤྱོད་རྫོགས་ལ་གནས། །མཁའ་འགྲོ་རྣམས་ནི་སྡུད་མཛད་པ། །གཏུམ་མོ་དེ་ལ་ཕྱག་འཚལ་ལོ། །ཞེས་པས་བསྟོད་དེ། སེམས་མོས་པ་དང་གུས་པ་བསམ་གྱིས་མི་ཁྱབ་པ་ཞིག་བྱས་ལ་ཐུན་གཏང་བར་བྱའོ། །དེ་ནས་ཐུན་མཚམས་སུ་ཡང་མཉམ་བཞག་དང་རྗེས་ཐོབ་བརྗེ་བ་ཞེས་
2-1-115b
བྱ་སྟེ་འོག་རླུང་ལ་འབད་རྩོལ་བྱ་ཞིང་། སྟེང་རླུང་ལ་ནི་འབད་རྩོལ་མི་བྱེད་མོད་ཀྱི་འོན་ཀྱང་རླུང་ཐ་མལ་དུ་མ་ལུས་པར་རྡོ་རྗེ་བཟླས་པའི་རང་བཞིན་དུ་མོས་པ་ནི་གལ་ཆེ་བར་བཞེད་དོ། །དེ་ལྟར་ཡང་དང་ཡང་དུ་གོམས་པར་བྱས་པས་རླུང་སེམས་ཨ་ལ་འདུས་པའི་རྟེན་འབྲེལ་ལས་ལུས་ལ་དྲོད་ཅུང་ཟད་སྐྱེ་བར་འགྱུར་རོ།། །།དེ་ནས་མེའི་རྣལ་འབྱོར་ནི། གཞན་ཐམས་ཅད་སྔར་བཞིན་བསྒོམས་ལ། ལྟེ་བའི་ཨ་ལ་སེམས་གཏད་པ་ན་རླུང་གིས་སྦྱར་བའི་ཚུལ་གྱིས་ཨ་ལས་མེ་ཕྲ་མོ་རེག་བྱ་ཤིན་ཏུ་ཚ་བ། རིང་ཐུང་སོར་བཞིའི་ཚད་ཙམ་འབར་བར་བསམ་སྟེ། དེ་ཡང་མེའི་དམིགས་པ་ཇི་ལྟར་ཕྲ་ཞིང་དྲོད་མྱུར་དུ་སྐྱེ་བ་ཡིན་ནོ་ཞེས་གསུང་ངོ་། །དེའི་གནས་སྐབས་སུ་ཡང་སྔ་མ་ལྟར་རླུང་ཐུབ་ཚད་དུ་གནོན་པ་གལ་ཆེའོ། །ངེས་པར་མི་ཐུབ་པ་ན་རང་བཞིན་གྱིས་སྔ་མ་ལྟར་འགྲོ་ལ། དམིགས་པ་ནི་མེ་ལ་གཏད་པར་བྱའོ། །དེ་ལྟར་མེའི་རྣལ་འབྱོར་དེ་ཉིད་ཀྱང་རྩོལ་བ་རབ་ཀྱིས་ལན་ལེ་འབྲིང་གིས་དྲུག ཐ་མས་གསུམ་ཙམ་བསྒོམས་ལ། ཐུན་གཏོང་བ་ན་སྔ་མ་ལྟར་བསྟོད་པ་བྱ་སྟེ། ཐུན་མཚམས་སུ་འོག་རླུང་ལ་འབད་རྩོལ་བྱ་ཞིང་ཅི་ནུས་ཀྱིས་མེ་ཕྲ་མོ་དེ་ཉིད་ལ་དམིགས་པར་བྱའོ། །དེ་ལྟར་ཡང་དང་ཡང་དུ་གོམས་པར་བྱས་པ་ལས་ལུས་ལ་དྲོད་ཆེར་འཕེལ་བར་
2-1-116a
འགྱུར་ལ། དེ་ལྟ་ན་གཏུམ་མོའི་ལམ་སྣ་ཟིན་པ་ཡིན་ཏེ། དེ་ཡང་གཏུམ་མོ་མེའི་དྲོད་ཀྱི་སྟོབས་ཀྱིས་བཟའ་བཏུང་ཐམས་ཅད་ཀྱང་བཞུ་སྟེ་བྱང་སེམས་སུ་འགྱུར་ལ། །གཞན་ཡང་རྩ་ན་གནས་པའི་བྱང་སེམས་ཐམས་ཅད་ཀྱང་བཞུ་སྟེ་དེས་བདེ་བ་དངོས་སུ་སྐྱེ་ལ། དེས་མི་རྟོག་པ་ཤུགས་ལ་སྐྱེ་བར་བདེ་སྟོང་ཟུང་དུ་ཆུད་པར་འགྱུར་ལ། དེ་ནི་སངས་རྒྱས་ཀྱི་བྱང་ཆུབ་ཀྱི་ལམ་ཐུན་མོང་མ་ཡིན་པ་ཡིན་ནོ་ཞེས་གསུང་བ་ནི་གཏུམ་མོའི་གདམས་ངག་ཀུན་ལ་གལ་ཆེ་བར་སེམས་སོ།། །།དེ་ནས་བྱང་ཆུབ་སེམས་ཀྱི་ཐིག་ལེའི་རྣལ་འབྱོར་ནི་གཞན་ཐམས་ཅད་སྔར་བཞིན་དུ་བསྒོམས་ལ། ལྟེ་བའི་ཨ་ལ་སེམས་གཏད་པ་ན་སྔ་མ་ལྟར་མེ་ཕྲ་མོ་བྱུང་སྟེ། དེ་ནི་ལྟེ་བར་གཏུམ་མོ་སྦྱར་བ་ཡིས་ཞེས་པའོ། །དེ་ནས་སྡེ་ཚན་བརྒྱད་ཀྱི་ཡི་གེ་བསྲེགས་ནས་ཨ་བ་དྷཱུ་ཏིའི་ལམ་ན་ཡར་སོང་སྟེ་སྙིང་གའི་ཡིག་འབྲུ་ལྔ་བསྲེགས་པར་བསམས་སྟེ། དེ་དག་དེ་བཞིན་གཤེགས་པ་ལྔའི་ས་བོན་ཡིན་པས་དེ་བཞིན་གཤེགས་པ་ལྔ་བསྲེགས་ཤིང་ཞེས་བྱ་བའོ། །དེ་ནས་ཡང་ཡར་ལ་སོང་སྟེ་མགྲིན་པའི་དབུས་ཀྱི་ཨ་དང་ཕྱོགས་བཞིའི་ཡི་གེ་ལྔ་བསྲེགས་པར་བསམ་སྟེ། དེ་དག་ཡུམ་ལྔའི་ས་བོན་ཡིན་པས་སྤྱན་ལ་སོགས་པ་ཡང་བསྲེགས་ཏེ་ཞེས་པའོ། །དེ་ནས་ཡང་ཡར་
2-1-116b
སོང་སྟེ་སྤྱི་བོའི་ཧཾ་ལ་རེག་ནས་དེའི་བྱང་སེམས་ཀྱི་ཐིག་ལེ་བཞུ་སྟེ་བྱང་ཆུབ་ཀྱི་སེམས་སྤྱི་བོ་ནས་གཡོ་བའི་འཛག་པ་རྣམ་པ་སྣ་ཚོགས་ཀྱི་སྐད་ཅིག་མ་དང་དགའ་བའི་ཡེ་ཤེས་སྐྱེ་བར་བསམ་མོ། །དེ་ནས་མར་ལ་འཛགས་ཏེ་དེས་མེ་དེ་མནན་པའི་ཚུལ་དུ་བྱས་ལ་ཡིག་འབྲུ་ཚོ་ཝལ་གྱིས་གསོས་ནས་རྣམ་པར་སྨིན་པའི་སྐད་ཅིག་དང་མཆོག་དགའི་ཡེ་ཤེས་སྐྱེ་བར་བསམ། དེ་ནས་མར་འཛགས་ཏེ་སྙིང་གར་ཕྱིན་པ་ན་ཡིག་འབྲུ་ཚོ་ཝལ་གྱིས་གསོས་ཤིང་རྣམ་པར་ཉེད་པའི་སྐད་ཅིག་དང་དགའ་བྲལ་གྱི་དགའ་བའི་ཡེ་ཤེས་སྐྱེ་བར་བསམ་མོ། །དེ་ནས་མར་སོང་སྟེ་ལྟེ་བའི་ཨ་ལ་རེག་པར་འགྱུར་བ་ལས་འདི་ལ་སྒོམ་ལུགས་གཉིས་ལས། གླང་པོ་ཆེ་ཚད་པས་གདུངས་པ་ལ་བུམ་པ་བརྒྱ་ཡིས་ཁྲུས་གསོལ་བའི་ལུགས་ཞེས་པ་མི་རྟོག་པ་ཤེས་ཆེར་སྐྱེ་བར་འདོད་པ་དང་། གཞོན་ནུ་མ་རྒྱན་གྱིས་བརྒྱན་པ་ལ་སྐྱེས་བུ་འདོད་ཆགས་ཅན་གྱིས་ཆགས་པ་ཚིམ་པར་བྱ་བའི་ལུགས་ཞེས་པ་བདེ་བ་ཤས་ཆེར་སྐྱེ་བར་འདོད་པའོ། །དེ་ལ་དང་པོ་ཐིག་ལེ་དེ་ཨ་ལ་རེག་ལ་ཁད་རེག་ལ་ཁད་པ་ལ་ཡུན་རིང་དུ་སེམས་གཏད་ལ་མཐར་ཨ་ཉིད་ལ་ཐིམ་པར་བྱའོ། དེས་ཡིག་འབྲུ་རྣམས་གསོས་ཤིང་ཐིག་ལེ་ལྟེ་བ་མན་ཆད་མ་ལུས་པ་ལ་ཁྱབ་ནས་མཚན་ཉིད་ཐམས་ཅད་དང་བྲལ་བའི་སྐད་ཅིག་མ་དང་ལྷན་
2-1-117a
ཅིག་སྐྱེས་པའི་དགའ་བ་སྐྱེས་པར་བསམ་མོ། །གཉིས་པ་ནི་དང་པོ་ཉིད་ནས་ཐིག་ལེ་དེ་ཨ་ཉིད་ལ་ཐིམ་པར་བྱས་ཏེ་སྔ་མ་ལྟར་བསྒོམ་མོ། །དེའི་གནས་སྐབས་སུ་ཡང་སྔ་མ་ལྟར་རླུང་ཐུབ་ཚད་དུ་གནོན་པ་ནི་གལ་ཆེའོ། །ངེས་པར་མ་ཐུབ་ན་རླུང་རང་བཞིན་གྱིས་སྔ་མ་ལྟར་འགྲོ་ལ། དམིགས་པ་ནི་མཐར་སྐྱེས་པའི་ལྷན་ཅིག་སྐྱེས་པའི་དགའ་བ་དེ་ཉིད་ལ་གཏད་པར་བྱའོ། །དེ་ལྟར་ཐིག་ལེའི་རྣལ་འབྱོར་དེ་ཉིད་ཀྱང་རྩོལ་བ་རབ་ཀྱིས་ལན་ལེ་འབྲིང་གིས། ཐ་མས་གསུམ་ཙམ་བསྒོམས་ལ། ཐུན་གཏོང་བ་ན་སྔ་མ་ལྟར་བསྟོད་པ་བྱས་ཏེ། ཐུན་འཚམས་(མཚམས་)སུ་ཡང་འོག་རླུང་ལ་འབད་རྩོལ་བྱ་ཞིང་ཅི་ནུས་ཀྱིས་ལྷན་ཅིག་སྐྱེས་པའི་དགའ་བ་དེ་ཉིད་དམིགས་པར་བྱའོ། །དེ་ལྟར་ཡང་དང་ཡང་དུ་གོམས་པར་བྱས་པ་ལས་ལུས་སེམས་ལ་དགའ་བ་བཞི་དངོས་སུ་སྐྱེ་ལ། དེ་ལས་ཀྱང་ལྷན་སྐྱེས་ཀྱི་དགའ་བ་དབང་གི་དུས་དང་འགྲན་ཐུབ་པར་འགྱུར་རོ། །དེས་མི་རྟོག་པ་ཤུགས་ལ་སྐྱེ་སྟེ་བདེ་བ་དང་སྟོང་པ་ཟུང་དུ་ཆུད་པས་སངས་རྒྱས་ཀྱི་བྱང་ཆུབ་ཀྱི་ལམ་དུ་འགྱུར་བའོ་ཞེས་གསུང་ལ། འདི་ལ་སྔ་མ་ལྟར་བསྒོམས་པ་ལས་མས་སྐྱེ་བའི་དགའ་བ་བཞི་ཞེས་པ་ཞིག་སྐྱེ་བར་འགྱུར་བ་སྦྱར་ལ། ཞལ་ནས་གསུང་བ་ནི་མེད་དོ།། །།


目录
འཁོར་ལོ་བཞི་ལ་བརྟེན་པའི་ཙཎྜ་ལཱི་ལ་བསླབ་པ་ཟབ་མོ།